رحلة فى حضن الموت

38748223_269024237212268_157233422652145664_n

إيزيس غانم

فى ذكرى حادث قطارين الصعيد

يا رحلة عمر
مرسومه مابين خطين
خط لخطاوى بتبدى
وبتتولد ف كفوف نهار
والتانى لنهاية سفر
ف طريق وعمر بيحتضر
مفيهوش خضار…!!
خط لبداية روح وليدة…
مخلوقه فى رحم العذاب…
وخط بيجمٓع بواقى
من بقايا قلوب داستها..
من سنين قدم الحياة
لما ساوتها بالتراب …!!
تعالى يا رحلة هحكيلك
حكاية شخص زار بابك
وسلم عمره ف رحابك ..
ده عم هلال….

وترحيلته اللى كات ويٓاه
وشال الجوع ..
وجلابيته اللى دوبها الأسى والنوح ..!!
ومنديله اللى كله جروح …
مهو يا رحلة كان زايرك
ومتلفع بجوع شاله
وترحيلته وترحاله
وتذكارته وهوان حاله
وحال المعجونين بهموم !!
دى ناس الهم ف وشوشهم
حفر برتوشه ملامحهم
وريشته رسمت الاوجاع
على كف الخدود منهم
وجوه مفطومه ع الحرمان
ماداقت طعم فرحه ف يوم …!!
قلوب الغلب عششها
وضلمها بسواد الظلم
عقول شاخت ….
نفوس صامت عن الأحلام
وسكنت فى بيار الخوف
فعلت كفة الظالم على المظلوم …

يا رحلة موت …
ف قطرين كانوا متواعدين…
قطر يعدى ..قطر يمر..
دهستى تحت أنيابك
قلوب متغلفه بالمر..!!
قلوب مكسيه بالصبار
وصابره هم صابره مرار…
على أحلام كتير ماتت ف وسط العمر
ومات العمر جواها..
مابين دمعه وبين آهه..
وبين لقمة غموسها القهر…!
يا قطرين العذاب والموت
بتغتصبوا الحياة من روح
على غفله ومن غير صوت
ضميركم غاب..
ضمير نايم ..ضمير معدوم
ضمير ميت ومتكفن
بكفن التوهه والغفله
ف قبر سكوت..
فسامحنى ياعم هلال
دانا نسيتك
ف وسط التوهة وصراخى على الاموات
سامحنى اكمنى مقدرتش
أصحصح فى ضمايرهم
قلوب عفٓن ف جوفها الجبن
ف موٓت فيها إنسانها
ف حضن سكات ..ف حضن سكات

Image may contain: train and outdoor
Advertisements


التصنيفات :شعر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: