نبضة الشوق

38748223_269024237212268_157233422652145664_n

 إيزيس غانم

من ديوان هلع الخوف

سألته وف وشى ابتسام
هوه احنا إمتى …والساعه كام؟؟
بص ف البعد المسافر المدى
وابتسم بسمه ف أرغولها الرضا
صنعلى دهشه وانفجر فيا الكلام
قالى قولى …كملى …
الليله إنتى والقمر بتفسروا الأحلام !!
ضحكت بالدهشه اللى فيا وقلتله
هوه احنا بنقى الكلام …؟؟
طبطب عليا بكل حب
حسيت بأن ف إيده قلب !!!
وابتدى يبدأ معايا الخطوه
والفرح ف عنيه …..
يشاورلى ع الأماكن ..
يحكيلى تاريخ صباه
يقول هنا أنا كنت بلعب
لعبة المساكه والرابط عنيه
وهنا ..كات خالتى أمنه وكلبها
دايما ف تيه….!!
لو حد خطى الغيط وعدى
تقوله إمشى كان يمشى يهجم
ع اللى بتشاور عليه …
أقوله إيه؟؟
يقولى عمرى جوه منى
وعشان بحبك لازم أحكيلك عليه…
أضحك ..ويضحك..
ونجرى ف الأرض الوسع جوزين حمام
وأقوله قول…
يقولى إيييييييييييه ؟؟
هو إحنا بننقى الكلام؟
معرفش كام م العمر عدا
معرفش كام ….
لما اتفجئنا بالوجع
واتفجئنا بالخصام….
كات روحى ساقيه …
وروحه كات شريان أمان
أصبله النيل يبدره …
تغرق شقوق الأرض وتخضّر غيطان
دلوقت فين؟؟
رقص العصافير والغنا فوق العيدان..
ولّى زمان الزقزقه …؟
وللا غابت من قلوبنا …
نبضة الشوق اللى كان؟؟؟؟
معرفش كام م العمر عدا
معرفش كام …
كنت اشوف روحه تغازلنى وكأنها
كائن وجودى وله وجود…
كنت من غير ملمح ملامحه بسمعه
عازف بيعزف بالوجع غنوة شرود
كل ده ولٓى ف طيات الغيوم !!؟
أعصر اليوم بالمحبه
ألاقى معصور المحبه
عصير نازف بالهموم !!!
أرفع عيونى للسحاب
ملاقيش ف صفحة رؤيتى غير الغياب!!؟؟
وانتظر …وانتظر …
وهفضل جوه انتظارى لحد مفنى العمر
أو يعود قلبي اللى غاب
أو يعود… قلبي اللى غاب ….

Image may contain: outdoor and water
Advertisements


التصنيفات :شعر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: