حودا صبي الميكانيكي – قصة قصيرة

17523181_1353526608072310_6063590146683784420_n

عزة حزين

واله ياحودا
أيوة يا أسطا
هات المفتاح
شوف عندك كرسي للزبون يرتاح
واله ياحودا
أيوااا يا أسطا
إشغل نفسك لم العدة
غور من وشي عبال مااتغدي
واله ياحودا
لم الصواميل ياللا من ع الارض
داانت محسوب عليا ف الورشة فرد
حاااضر يامعلم حااضر يامعلم
وأنا جوايا بأتألم
زهقت م الاوامر
عايز أهرب وأغامر
وااد ياحوداا
هات الكريك
وإنزل تحت العربية
وإسندها بطوبة مش بإيديك
وشوف ايه اللي معطلها
ومش مخليها تدور
بس أنا خايف يااسطا
لتدور عليا الموتور
أدور عليك ؟؟؟
آه تدور عليا بالمفتاح
وتدوس عليا بالعربية
هأهأ أحسن والله ومن وشك أرتاح
ومين يااسطا حيساعدك
ويقضيلك حاجتك
هاها ماتخافش ياض
داانا بأهزر هو انا برضك
ااقدر أستغني عنك ؟؟؟
مقدرشي
إتعودت آجي ألاقيك مروق الدكان
وراشش مية حولين المكان
وكانس تحت الرصفان
ومدور الراديو علي القرآن
واما تشوفني هالل
بتجري تجيب لي المعسل والدخان
حافظ مكان العدة
وعارفها حتة حتة
ومش ناسي ياوله سندوتش الكبدة
اللي أمك بتبعتهولي
عملاه يعني عشانك وسطة
وطبق الحلويات اللي بتدوق هالي
وتقولي
أمي بتسلم وبتقولك بيا إتوصي

وأنا مش ناسي يااسطا
دانا اللي قفايا متعلم
من كتر ضربك فيا
من غير مااتكلم
علي غفلة وأنا شغال وبتعلم
ماانا فاهم انك الملقن والمعلم
وف يوميتي بتزود وعلي كيفك تخصم
داانا كلي 13سنة
كان نفسي للعلام اكمل
وافضل مع زمايلي القدام
لكني بأهرب منهم
وأعمل نفسي مش عارفهم
ومش حتي عليهم بأسلم
ولما إشتغلت وقولت أتعلم
وبقيت صبي ميكانيكي ولحام
نسيت طعم الراحة
وبقيت عشان اللقمة
بأتحمل وحأكمل
وعامل نفسي فرحان وأنا الشقيان
لابس هدمة من برا
بس جوايا واحد عريان
هدمتي مقطعة ومليانة خرام
بلوفر مدارى عضمي لكن لساااااني بردان
مافيهشي حتة سليمة غير بس الإكمام
والشكل من قدام
وبنطلوني م الركب مرقع
واسع ويلبس معايا واحد كمان
بأزعل من شكلي لما أعدي علي مانيكان
ملبسينو الغالي وعارضينو يعمل إعلان
طب داانا اللي دم ولحم داانا الانسان
ومش سايبينو حافي ملبسينو جزمة بلسان
نفسي ألبس نضيف وأقف علي باب دكان
كان نفسي ألبس زي فلان اللي من سني
وإحنا كمان من زمان جيران
بس لما بيشوفني بيبصلي وهو قرفان
ماانا كأني مدهون وشي شحم وقطران
لو عندي شامبوه ومية نازلة م السخان
كنت حتحبني
وكنا حنجيب ف بعض لما نلعب إجواان
لكن عمرك ما حتفكر تلاعبني
ولا تلاعب أي واحد زيي غلبان
ساكن أنا ع السطح جنب بنية الحمام
وهو ساكن ف فيلا والحارس يوميا
بيديله التمام
……………. تمت

Image may contain: 2 people, people sitting
Advertisements


التصنيفات :شعر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: